أتعامل إزاي مع الموظف اللي دايماً بيطلب سلف؟

طلبات السلف المتكررة بتعمل ربكة في الحسابات وممكن تقلب الـ HR لجمعية خيرية. بس في نفس الوقت، إحنا بشر وظروف الناس الاقتصادية صعبة، ومينفعش تقفل الباب في وش موظف عنده أزمة حقيقية. الحل هو وجود سياسة سلف واضحة (Loan Policy) معلنة للجميع. حدد شروط: السلفة لا تتعدى 25% من المرتب، وتتخصم على قسطين أو تلاتة بالكتير. وتكون لظروف طارئة (وفاة، مرض، زواج) مش لمصروقات عادية. لو لقيت موظف بيطلب سلفة كل شهر، ده عنده مشكلة في إدارة راتبه. هنا دورك ممكن يكون ناصح (Counselor)، وتنصحه بإن السلف المتكررة بتقلل دخله الشهري اللي جاي وهيدخل في دايرة مفرغة. أهم حاجة العدالة. اللي يتطبق على المدير يتطبق على الغفير. مفيش استثناءات عشان متفتحش باب القيل والقال والمحسوبية في الشركة.